Cinco grupos finalistas
optan ó primeiro premio, a grabación
dun cd.
A emisora Radio Obradoiro,
do Grupo Correo Gallego, celebra este xoves no
Teatro Principal de Santiago de Compostela a final
do V Certame de Música Folk. É unha
iniciativa que vai dirixida a grupos e solistas
que no momento da convocatoria do concurso non
teñan asinado ningún contrato discográfico.
Despois do habitual proceso de selección,
a cargo dos responsables do programa "En
clave de folk", resultaron finalistas as
formacións:
Árdelle
o Eixo, Brendam, Lugnasad, Lumia e Xochilmica.
Cada un dos grupos
interpretará este xoves tres pezas, alomenos
dúas propias, no transcurso da gala. Un
xurado especializado será o encargado de
decidir quen leva o primeiro premio. Desta volta
está composto por Pedro Pascual, Davide
Salvado, Benjamín Otero (Huevo), Sonia
Lebedynski e Lois Atanes. Mentres o xurado delibera,
o público poderá desfrutar da actuación
do grupo gañador na última edición,
Grodan
De Fló.
Trátase dunha
iniciativa que partiu do programa "En clave
de folk", presentado e dirixido por María
Xosé Gómez e Paulo Gacio. Emítese
os luns entre as 15:00 e as 16:00 horas, e logo
da medianoite ás dúas da madrugada.
Os gañadores das anteriores convocatorias
deste certame, ó único que se celebra
en Santiago, foron Alfolíes, Quempallou,
Roi Xordo e Grodan De Fló. Para algún
deles supuxo o empuxe definitivo. Por exemplo,
Quempallou, co disco gravado no certame, conseguiu
chegar ó número un da lista dunha
prestixiosa emisora de radio de Canadá.
Con este tipo de
proxectos, o Grupo Correo Gallego quere amosa-lo
seu compromiso coa cultura galega, ademais nun
ano tan significativo coma este Xacobeo 2004.
O proxecto conta coa colaboración da Consellería
de Cultura, Comunicación Social e Turismo,
e o Concello de Santiago. Patrocinan Coca-Cola,
Daviña, Phonos, Restaurante Belgo, Neumáticos
Radial, Café Vivacce e Pub Momo.
A cita, xoves
13 de maio, ás 21:00 horas, con
entrada libre, no Teatro Principal de Santiago
de Compostela.
Para máis
datos contactar con María Xosé Gómez:
981 543 719 ou 676 965 976.
